Юрий ПУЧКИН: «ВАДРЯ СПЕЦИАЛИСТЭСЬ
ТОНАВТНИ ВЕСЕ ЭРЯМОНЗО ПЕРТЬ»✨✨✨💥💥💥
Эрьва иень октябрянь 5-це чистэ эсь профессиональной кенярксчист тешкстыть Россиянь уголовной розыскень важодицятне. Уголовной розыскень центральной управлениясь – Центророзыскесь – теезель 1918 иень октябрясто. Те шкастонть саезь милициянь местной органтнэнь юрсо кармасть важодеме сэтьмечинь ванстомань башка подразделеният, конатне ванность-панжсть уголовной ёнкс марто закононь коламотнень ды бороцясть бандитизманть марто. Ламо иень перть те службась виевгавтовсь ды вадрялгавтовсь.
Неень шкасто Российской Федерациянь Внутренней тевень министерствань Уголовной розыскень прявт управлениясь ловови МВД-нь центральной аппаратонь башка структурной подразделениякс, конась важоди уголовной ёнкс марто закононь коламотнень анолдамонть, муеманть ды панжоманть коряс, топавты оперативной-вешнемань тевтнень. Оперативниктнень важодемаст свалшкане сюлмавозь апелеманть марто, зыянтнэнь а нолдамга сынь а ванстыть эсь прянть. Вешнемат-кундсемат, засадасо аштемат, преступниктнень марто сельмеде сельмес вастовомат – весе тенень уголовной розыскень важодицясь анок эрьва чистэ, эрьва минутасто.
Те профессиясонть – ансяк виев, кеме обуця, чарькодиця, эрьванть марто кель-валонь муиця ломанть. Истяттнэнь юткс апак кавтолдо совавтови Рузаевкань муниципальной районга Россиянь МВД-нь Уголовной розыскень отделэнь прявтонь полавтыцясь полициянь подполковникесь Юрий Иванович ПУЧКИН. Сон малав комсь иеть канды службанть правоохранительной органтнэсэ, ульнесь участковой уполномоченноекс, старшей участковоекс, меельце зярыя иетнень перть важоди уголовной розысксэ. Эсь службанть лови эрявиксэкс, эдь лездамс лиятненень – эрявикс тев.
Юрий Пучкин чачсь-кассь Отяжелень Мордовские Дубровки велесэ. Пучкинтнэнь семиясь велесэнть свал ульнесь весень туртов невтемакс – эрить ояксчисэ, важодемадо а орголить, лездыть, мезень коряс иля пшкаде. Иван Кузьмич ды Раиса Андреевна сынськак бажасть улемс алкуксонь ломанекс, теньс тонавтсть эсь цёратненьгак – Юрань ды Сергеень. Паряк, эйкакшпорасто кемекстазесь ладинзеяк сынст эрямотнень.
Сабанцелень средней школанть прядомадо мейле Юрий мольсь тонавтнеме Н. П. Огарёв лемсэ МГУ-нь Аграрной институтов, «Ветеринарной врач» специальностенть коряс. Университетсэ тонавтнеманть прядозь, зярыя шкань перть роботась специальностень коряс, мейле ютась служба армиясо. Тосто велявтозь, велень хозяйствань ёнкссо важодемань мелесь кода-бути лепамсь. Цёрась кармась вешнеме эстензэ тев, конась улезэ седеень коряс. Тесэ ялгазо мерсь, мекс бу тензэ а варчамс эсь вийтнень правоохранительной органтнэсэ.
– Истя теиньгак. Саимизь сестэ эштё милициянь участковой уполномоченноекс. Те ульнесь 2003 иестэ, – корты Юрий Пучкин. – Правоохранительной органтнэсэ важодема ким ушодовсь Саранск ошонь Ленинской РОВД-сэ. Васня малав кавтошка иень перть ульнинь участковоекс, мейле, 2005-2007 иетнестэ – старшей участковоекс. 2007 иень июльстэ саезь карминь важодеме Мордовия Республикава Россиянь МВД-нь Уголовной розыскень управлениясо.
Участковоекс важодемадонть кортамсто Юрий Иванович тешкстызе, правопорядкань ды властень органтнэсэ важодицятнень эйстэ участковой уполномоченноесь ашти сехте малавиксэкс ломантненень. Ды, кода содатано, участковоесь – эрицятнень васенце лездыцяст. Самай те таркасонть важодемань иетнень перть Ю. И. Пучкин тонавтнесь пек ламос.
– Участковойтнень важодемаст мельстуиця ды сюлмавозь эрямонь весе ёнкстнэнь марто. Свал ломань ютксат, важодемань эрьва чись лия ёнов а молиця, свал эйсэть учи мезяк од. А стяко кортыть, участковоенть 101 тевезэ, – тешксты Юрий Пучкин. – Эрьва чинек ушодовиль планёркасто, косо толковавиль важодемань чись ды ушодовиль материалтнэнь, пшкадематнень, яволявтоматнень лангсо важодемась. Эряви тешкстамс, участковоесь седе ламо важоди эрицятнень яволявтомаст, пшкадемаст ды пачтямост коряс. Лиякс меремс, важодить сень коряс, мезе мелявтовты ломантнень.
Юрий Пучкин тешксты сеньгак, участковоентень эряви улемс куш кодамо тевсэ чарькодицякс, парсте содамат законтнэнь. Секскак зярыя шкань перть участковоекс важодезь, од цёрась сась мельс кастомс эсь содамочитнень ды мольсь тонавтнеме Юстициянь министерствань Правовой академияв, конань прядызе 2010 иестэ.
Старшей участковой уполномоченноень таркасонть Юрий Пучкин важодсь истя жо кавтошка иеть. Ды 2007 иень кизна сон ютась Уголовной розыскень управленияв. Васняяк ульнесь оперуполномоченноекс, мейле – старшей оперуполномоченноекс, гражданской тевтнень коряс старшей оперуполномоченноекс. Тедедень июльстэ сонзэ аравтызь Рузаевкань муниципальной районга Россиянь МВД-нь Уголовной розыскень отделэнь прявтонь полавтыцякс.
– Кодамо таркасо бу аволинь важоде, системась вейке – МВД-сь. Ды тесэ эрьва тевесь – ответственной, – корты Юрий Пучкин. – Участковоекс важодеманть шкасто тонь прявт теветь – сэтьмечинь ванстомась, закононь коламотнень лангс ливтемась ды панжомась, эрицятнень марто важодемась. Весе кевкстематне, конат лиснить эрицятнень пельде, седе сеедьстэ решавить участковойтнень лезксэст вельде. Уголовной розысксэ ванкшнотано лия зыянов тевтнень. Ды уш аволь административной тевть – уголовнойть. Важодемась тесэ монь туртов седе мелень коряс, тевтнедеяк ванкшнотано эрьва кодат. Эрьвась эсь койсэ явовиця, эрьванть ванкшнома башка.
Юрий Ивановичень превсэ ашти эрьва тевесь, конань лангсо сон важодсь, конань панжсь. Аволь аламо сынст ютксо ульнесть резонанснойтькак. Вейкесь эйстэст сюлмавозь банкоматсто ярмаконь саламонть марто. Тевесь лиссь 2020 иень апрельстэ. Рузаевкасо коласть банкомат ды саласть малав 2 миллионт целковойть. Шкань апак таргсе ушодокшность салыцятнень вешнеме. Ды оперативниктненень сестэ пек лездась ДНК-нь пельксэсь, конань сынь саизь педиця лентанть лангсто, конасонть пекстазель банкоматонь камерась. Вановт алов саезельть Удмуртиянь ды Санкт-Петербургонь зярыя эрицятне. Васняяк Рузаевкань Уголовной розыскень важодицятне вейсэ полициянь райотделэнь специалисттнэнь марто муизь Удмуртиянь эрицятнень, ваннызь сынст ДНК-ст – вейкетстямот эзть муе. Ушодсть ванномо Санкт-Петербургонсетнень ДНК-ст. Ды вана тесэ весемесь лиссь. Чумондомань кемевтемань базась пурназель, тевесь максозель судс. Ды, эряви меремс, сестэ те ДНК-нть коряс панжозельть эштё вете преступленият, конатне теезельть Россиянь лия оштнесэ.
– Тевенть лангсо важодемась мольсь иеде седе кувать. Эрявсь пурнамс весе материалтнэнь, кемекстамс чумондовицятнень, муемс сынст. Весе тень лангс юты шка, ды аволь аламо шка, – корты полициянь подполковникесь. – Эштё тешкставлия бу истямо ёнксонть. Внутренней тевень органтнэнь важодемасо покш тевекс ашти полициянь сотрудниктненень эрицятнень кемемась. Паро, неень шкане улить истят ломанть, конатне лездыть полициянтень закононь коламотнень ливтемасо, лоткавтомасо ды панжомасо. Лездыть закононь колыцятнень вешнемасояк. Ансяк улить истяткак, конат весе тенень кандовить мельде-валдо.
Зярдо Юрий Пучкинэнь кевкстинек: кодамокс эряви улемс уголовной розыскень важодицянтень, сон кемекстась кавксо профессиональной ёнкст: аналитической ёрокчись, логикась, эрязасто арсемась, пшти вановтось, аккуратнойчись, цидярдомась, эсь содамочитнень ды ёрокчинть свалшкань кастомась, технической средстватнень тонавтнемась. А сень лангс ванозь, шкатнень марто полавтовить важодема лувось ды технологиятне, эряви а кадовомс тень эйстэяк. Лиякс меремс, вадря специалистэсь тонавтни весе эрямонзо перть.
Савкшнось цёрантень кандомс службанть республиканть томбалеяк. 2017 иестэ Юрий Пучкин ульнесь командировкасо Северной Кавказсо. Пельиень перть эсь коллегатнень марто, полициянь сводной отрядонть юрсо, косо сон ульнесь командирэнь полавтыцякс, сынь ванстсть тосонь эрицятнень сэтьмечист.
Прявт нежекс ды эрямонь весе смустекс Юрий Ивановичень туртов ашти семиязо: низэ – Олеся Васильевна ды цёранзо – Иван ды Александр. Иван ней тонавтни омбоце курссо Н. П. Огарёв лемсэ МГУ-нь математикань ды информационной технологиянь факультетсэ. Александр – 8-це классо. Сынь пек парсте чарькодить, кодамо эрявикс тев топавты тетяст, секскак зярдояк а кежиявтнить, бути тонась сыненст яви аволь истя ламо шка, кода бу эряволь.
– Покш сюкпря, нимгак ды эйкакштнеяк чарькодить эйсэнь. Эдь правоохранительной органсо важодицятнень юткошкаст малав овсе а эрси. Бути жо те шкась ули, сон весе алтави семиянтень. Теке марто ней вана арсян ды овсе а янксян, эсь эрямонть сюлмия службанть марто. Косо эштё бу мон муевлия эсь прям. Нама, улить стакачить. А кодамо тевсэ сынь арасть?! Ды, мезеяк лангс апак вано, мон вечкса эсь роботам ды покш мельсэ топавтан сонзэ, – кемексты Юрий Пучкин.
Юлия Еремина
